დეპუტატი სალომე სამადაშვილი საპარლამენტო სხდომაზე ,,ქართული ოცნების“ წევრებსუიკრაინის ომის ამსახველ ფოტოებს აჩვენებს და ეუბნება, რომ ამ ხალხის და ამ ვითარების დამსახურებაა ის, რომ საქართველოს ევროკავშირში გაწევრიანების კითხვარი გადმოეცა.

სამადაშვილის განცხადებით, საქართველოს ხელისუფლება პირობებს უყენებს იმ ქვეყანას, რომელმაც მხოლოდ ბუჩაში 320 ადამიანი დაკარგა.

,,ორი დღეა გვესმის ,,ქართული ოცნების" წარმომადგენლებისგან წარმოუდგენელი განცხადება, რომ თითქოს ევროკავშირში გაწევრიანებასთან დაკავშირებით კითხვარის გადმოცემა რომელიმე თქვენგანის დამსახურებაა. ამიტომ ახლა ძალიან გთხოვთ კარგად შეხედოთ ამ ფოტოებს და გაიხსენოთ და ეგება გაიგოთ, ვისი დამსახურებაა, რომ დღეს ჩვენ გადმოგვეცა ევროკავშირის კითხვარი. ეს არის ამ ხალხის დამსახურება, იმ 180 ბავშვის, რომელიც რუსეთმა მოკლა უკრაინაში, 1 800 მშვიდობიანი მოქალაქის, რომელიც რუსეთმა მოკლა უკრაინაში, იმ 5 მილიონი ლტოლვილის, რომელიც გამოიქცა საკუთარი სახლებიდან. კარგად შეხედეთ ამ ფოტოებს.

ამ ადამიანებს, რომლებსაც მარტო ბუჩაში 320 ადამიანი მოუკლეს რუსებმა, თქვენი ხელისუფლება, ირაკლი კობახიძე უყენებს პირობებს, რა პირობით ჩავა ქართული ოცნების დელეგაცია სამძიმარზე სოლიდარობის დასაფიქსირებლად" _ განაცხადა სალომე სამადაშვილმა.